Si Thalia Ymari Torrelavega ang nag-iisang tagapagmana ng Torrelavega Constructions, subalit hindi saklaw ng kaniyang interes ang pagpapatakbo ng negosyo, lalo pa ng isang construction company. Upang matuto, madalas siyang sinasama ng kaniyang ama sa tinatayong Paradiso, ang pinakamalaki nilang proyekto sa isla ng El Blaza. Dito niya nakilala ang isang makisig ngunit mailap na binatang si Lucas Carlos Saavedra. Sa taas ng pader na naghihiwalay sa kanilang mga estado sa buhay, hindi sila nagkasundo; aso't pusa, away-bati. Gayon man ang naging pagsasama, unti-unting nabuo ang isang magandang pagkakaibigan sa dalawa hanggang ang lahat ng pagsubok at bangaya'y nauwi sa pag-iibigan. Masaya na ang lahat nang dumating ang isang trahedyang gugunaw sa matibay nilang pagssama. Isang malakas na bagyo ang tumama sa isla at sa hindi inaasahang pangyayari, kinain ng isang higanteng alon ang Paradiso at kasabay ng pagbalik ng nagngangalit na tubig sa karagatan ay ang pagkadurog ng lahat ng pangarap na nabuo ng kanilang pagmamahalan... Isa nga bang biyaya ang pagkawasak ng nagtataasang bakod sa pagitan nina Lucas at Thalia? O isa ba itong sumpa na magdudulot ng sugat na habang-buhay nilang dala-dala?